Manufahi- 13/09/2023- Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos akompañia husi Diretór Nasionál Ensinu Sekundáriu Tékniku Vokasionál, Diretór Nasionál Ensinu Sekundariu Jéral, hala’o enkontru hamutuk ho Servisu Munisipal Edukasaun Manufahi kompostu husi Diretór Servisu Munisipal Edukasaun ho estrutura nomos Profesóres Eskola Sekundária Jerál 1912, iha salaun eskola Sekundária Jerál 1912 Manufahi.
Iha enkontru ne’e Diretór Servisu Munisipal Edukasaun Manufahi (Sr. Trinito Sarmento), hato’o agradesementu boot ba Ekselensia Sekretariu Estadu ESGETV ho Ekipa Ministeriu Edukasaun nian, bele mai iha Munisipiu Manufahi, hodi hare diretamente kondisoens jeral eskola sira nian.
Iha eskola tékniku vokasionál sira presiza investimentu bo’ot ho nune’e bele responde ejijensia públiku liu hosi kriasaun sistema modular.
“Edukasaun mak sai hanesan baze fundamentu ida, edukasaun mak sai hanesan fatin konseitu ida, hodi halibur no muda karakter ema ninian hodi bele prepara ba futuru nasaun ninian”, dehan Sr. Trinito Sarmento – Diretór Servisu Munisipal Edukasaun Manufahi.
Iha fatin hanesan Ekselénsia Sekretáriu Estadu ESGETV Sr. Domingos Lopes Lemos hateten, preokupasaun ne’ebé mak Eskola sira hato’o parte Ministériu Edukasaun rejista ona, nune’e iha futuru bele tau iha planu.
Ministeriu Edukasaun, IX Governu Konstitusional, iha komitmentu boot atu tulun estudante sira, liu hosi hari no hadia biblitekas, aumenta salas de Aula, halo konstrusaun no rehabilitasaun ba eskola nomos prepara matadalan ba professores no livrus kada disiplina ba Alunus, hodi nune’e bele ajuda hasae nivel aproveitamentu no partisipasaun alunus kada nivel eskola iha prosessu aprendizajem .
“Foin lalais eskola Paralelo Sekundária Jerál 1912 Turiskai haruka ona proposta ba iha Ministériu Edukasaun, husu livru, kadeira no meza. Proposta refere hetan ona aprovasaun no agora Diresaun Nasional Patrimoniu no Lojistika, hahu halo preparativu ba distribuisaun materiais hirak ne’e maibe sei fó tuir kbi’it Ministeriu Edukasaun nian.
Ekselénsia Sekretariu Estadu ESGETV hateten tan katak, Planu Ministériu Edukasaun nian iha futuru atu hapára eskola paralelu sira, tanba barak mak laiha kondisoens adekuadu. Nune’e mós Eskola paralelo sira, barak mak simu tan professóres voluntáriu, maibe la hatan ka responde ba nesesidades eskola nian. Tanba ne’e mak polítika Ministériu Edukasaun nian provizoriamente sei hapara lai, hodi submete ba prosessu avaliasaun, estuda no haree kondisoens, antes fo lisensiamentu no autorizasaun.
Eskola Sekundária Jerál 1912 iha Postu Administrativu Same nia paralelu rua (2) ida iha postu administrativu Turiskai, ida iha Same Vila, eskola Téknika Vokasionál Munisípiu Manufahi hamutuk (6) neen, (tolu privadu no tolu públiku).
Hafoin remata enkontru ne’e Ekselénsia Sekretáriu Estadu ESGETV ho ekipa akompania husi Diretór Servisu Munisipal edukasaun Manufahi hala’o vizita kedas ba eskola Sekundária Jerál Halibur Betano.
Leave a Reply